HIZI NDIYO SABABU ZA HUMUD KUONDOKA MAJIMAJI FC

Ofisa Habari wa Majimaji, Onesmo Ndunguru

WIKI kadhaa baada ya kiungo mkabaji Abdulhalim Humud kutangaza kujiondoa kwenye kikosi cha Majimaji, hatimaye klabu hiyo imetoa jibu kuhusu Humud.

Humud, kiungo wa zamani wa Simba na Coastal Union alisajiliwa na Majimaji mwanzoni mwa msimu huu wa 2017/18 lakini hakudumu muda mrefu na ikaelezwa kuwa ameondoka kutokana na kutokuwa na maelewano mazuri na uongozi wa Majimaji.

Akizungumzia juu ya hali hiyo, Ofisa Habari wa Majimaji, Onesmo Ndunguru, alisema ni kweli Humud hayupo lakini yeye mchezaji ndiye ambaye aliyeomba kuachwa kutokana na sababu za kifamilia.

“Humud ni kweli hatutakuwa naye, hiyo ni rasmi, yeye ndiye aliyeandika barua ya kuomba kuondoka Majimaji, alisema ana matatizo ya kifamilia na hataweza kuwa mbali na familia yake.

“TFF wameshaandika barua kwa Majimaji na Majimaji imeshajibu kwa kutoa barua ya kumuacha na kilichokuwa kimebakia ni kupatiwa haki zake,” alisema Ofisa Habari huyo.